Jahan Talak Bhi Ye Sehara Dikhai Deta Hai 
Meri Tarah Se Akela Dikhai Deta Hai 

Na Itana Tez Chale Sar Phiri Hawa Se Kaho 
Shajar Pe Ek Hi Patta Dikhai Deta Hai
 
Bura Na Maniye Logon Ki Aib Jui Ka 
Inhen To Din Ka Bhi Saya Dikhai Deta Hai 

Ye Ek Abr Ka Tukara Kahan Kahan Barase 
Tamam Dasht Hi Pyasa Dikhai Deta Hai 

Wo Alwida Ka Manzar Wo Bhigati Palaken 
Pas E Gubar Bhi Kya Kya Dikhai Deta Hai 

Meri Nigah Se Chup Kar Kahan Rahega Koi 
Ke Ab To Sang Bhi Shisha Dikhai Deta Hai 

Simat Ke Rah Daye Akhir Pahar Se Qad Bhi 
Zamin Se Har Koi Uncha Dikhai Deta Hai 

Ye Kis Maqam Pe Lai Hai Justaju Teri 
Jahan Se Arsh Bhi Nicha Dikhai Deta Hai 

Khili Hai Dil May Kisi Ke Badan Ki Dhup "shakeb" 
Har Ek Phul Sunehara Dikhai Deta Hai.