Ye Tabiyat Hai To Khud Aazaar Ban Jaayenge Ham 

Chaaraagar Royenge Aur Gamkhvaar Ban Jaayenge Ham 

Ham Sar-e-chaak-e-vafaa Hain Aur Teraa Dast-e-hunar 

Jo Banaa Degaa Hamen Ai Yaar Ban Jaayenge Ham 

Kyaa Khabar Thi Ai Nigaar-e-sher Tere Ishq Men 

Dilbaraan-e-shahar Ke Dildaar Ban Jaayenge Ham 

Sakht Jaan Hain Par Hamaari Ustavaari Par Na Jaa 

Aise Tuutenge Teraa Iqaraar Ban Jaayenge Ham 

Aur Kuchh Din Baithane Do Kuu-e-jaanaan Men Hamen 

Raftaa Raftaa Saayaa-e-divaar Ban Jaayenge Ham 

Is Qadar Aasaan Na Hogi Har Kisi Se Dosti 

Aashnaai Men Teraa Mayaar Ban Jaayenge Ham 

Mir-o-gaalib Kyaa Ke Ban Paaye Nahin Faiz-o-firaaq 

Zam Ye Thaa Ruumi-o-ataar Ban Jaayenge Ham 

Dekhane Men Shaakh-e-gul Lagate Hain Lekin Dekhanaa 

Dast-e-gulchin Ke Liye Talvaar Ban Jaayenge Ham 

Ham Chiraagon Ko To Taariki Se Ladanaa Hai `faraz`

Gul Hue Par Subah Ke Aasaar Ban Jaayenge Ham